Malaysia Airlines, aeroplani i së cilës me 239 udhëtarë u zhduk para tri vitesh, është bërë kompania e parë ajrore që ka nënshkruar marrëveshjen për përcjelljen e fluturimeve nga hapësira.

Sipas marrëveshjes së arritur me kompanitë Aireon dhe FlightAware, sistemi i ri do të mundësojë përcjelljen e fluturimeve në gjithë botën, madje edhe në rajonet polare dhe oqeanet më të largëta, thuhet në deklaratën për media të kompanisë Aireon, e cila merret me përcjelljen e trafikut ajrore nga hapësira, transmeton Bloomberg.

Rrjeti i ri satelitor i Aireon, i cili vendoset bashkërisht me kompaninë Iridium Communications, duhet të përfundojë në vitin 2018.

Aeroplanët në shumicën e fluturimeve ndërkombëtare përdorin teknologjinë ADS-B për dërgimin e lokacioneve të tyre, ndërsa sinjali mund të përcillet nga toka ose hapësira. SHBA tashmë ka vendosur sistemet tokësore për përcjellje për ADS-B.

Aeroplani në fluturimin MH370 ishte nisur më 8 mars 2014 nga Kuala Lumpur drejt Pekinit. AI ndërkohë kishte ndërruar drejtimin mbi Malajzi dhe pastaj ishte drejtuar kah pjesët e largëta të Oqeanit Indian.

Pas hulumtimeve shumëvjeçare, aeroplani nuk është gjetur kurrë.

Nëse sistemi i ri Aireon për përcjellje do të mund të ndihmonte në gjetjen e aeroplanit në këtë fluturim, nuk është në tërësi e qartë, konkludon Bloomberg.

Në fluturimin e kobshëm MH370 transmetuesi i lokacionit të aeroplanit ishte shuar, me siguri qëllimisht, dhe se aeroplani nuk ishte i dukshëm as në rrjetin satelitor.